မြန်မာနိုင်ငံမိခင်နှင့်ကလေးစောင့်ရှောက်ရေးအသင်းမှ မိခင်နို့တိုက်ကျွေးရေး ရက်သတ္တပတ်နှင့် အာဟာရဖွံ့ဖြိုးရေး ရက်သတ္တပတ်လှုပ်ရှားမှု အထိမ်းအမှတ် အခမ်းအနား ကို ၂၀၂၅ ခုနှစ်၊ ဩဂုတ်လ (၂၂)ရက်နေ့ နံနက်(၉ :၀၀)နာရီတွင် နေပြည်တော်၊ ဒက္ခိဏသီရိမြို့၊ သုခုမလမ်းရှိ မြန်မာနိုင်ငံမိခင်နှင့်ကလေးစောင့်ရှောက်ရေးအသင်း သင်တန်းခန်းမ၌ ကျင်းပပြုလုပ်ခဲ့ပါသည်။
အခမ်းအနားသို့ မြန်မာနိုင်ငံ မိခင် နှင့်ကလေးစောင့်ရှောက်ရေးအသင်း ဥက္ကဋ္ဌ၊ ဒုတိယဉက္ကဋ္ဌ နှင့် ဗဟိုအလုပ်အမှုဆောင်အဖွဲ့ဝင်များ၊ နေပြည်တော် မိခင်နှင့်ကလေးစောင့်ရှောက်မှု ကြီးကြပ်ရေးအဖွဲ့မှ ဥက္ကဋ္ဌနှင့် အဖွဲ့ဝင်များ၊ မေတ္တာစမ်းရေးဆေးခန်း မှ ကိုယ်ဝန်ဆောင် (၃၀)ဦးတို့ တက်ရောက်ခဲ့ ကြပါသည်။
အခမ်းအနားအစီအစဉ် ပထမပိုင်းတွင် မြန်မာနိုင်ငံမိခင်နှင့်ကလေးစောင့်ရှောက်ရေးအသင်း ဥက္ကဋ္ဌ ပါမောက္ခဒေါက်တာစန်းစန်းမြင့်အောင် မှ အဖွင့်အမှာစကားပြောကြားရာတွင် အသင်းကြီး အနေဖြင့် ကျန်းမာရေးဝန်ကြီးဌာနနှင့် ပူးပေါင်းပြီး အာဟာရဖွံ့ဖြိုးရေး ရက်သတ္တပတ်များ လှုပ်ရှားမှုနှင့် မိခင်နို့တိုက်ကျွေးရေး ရက်သတ္တပတ်လှုပ်ရှားမှုများကို နှစ်စဉ်နှစ်တိုင်းပူးပေါင်းဆောင်ရွက်လျက် ရှိပါတယ်။ “အာဟာရဖွံ့ဖြိုးရေး ရက်သတ္တပတ်များ” အဖြစ် သြဂုတ်လ တစ်လလုံး အကောင်အထည် ဖော်ဆောင်ရွက်ခဲ့တာ နှစ်စဉ်နှစ်တိုင်း ဖြစ်ပါတယ်။ နှစ်စဉ် သြဂုတ်လရဲ့ ပထမပတ်ဟာ မိခင်နို့ စနစ်တကျတိုက်ကျွေးရေး ရက်သတ္တပတ်အဖြစ်လည်းကောင်း၊ ဒုတိယအပတ်ကို ငါးနှစ်အောက်ကလေး နှင့် ကျောင်းသားလူငယ်များ အအာဟာရဖွံ့ဖြိုးရေးရသတ္တပတ်အဖြစ်လည်းကောင်း၊ ယခုတတိယ အပတ်ကို ကိုယ်ဝန်ဆောင်မိခင် နှင့် နို့တိုက်မိခင်များ အာဟာရဖွံ့ဖြိုးရေး ရက်သတ္တပတ် အဖြစ် လည်းကောင်း၊ စတုတ္တအပတ်ကို အိုင်အိုဒင်းချို့တဲ့မှုပပျောက်ရေးရသတ္တပတ်အဖြစ် လည်းကောင်း တစ်နိုင်ငံလုံးအတိုင်းအတာဖြင့် ကျန်းမာရေးဝန်ကြီးဌာနနှင့် ပူးပေါင်းပြီး တနစ်တကျ အကောင်အထည် ဖော်ဆောင်ရွက်လျက်ရှိပါတယ်။ ငါးနှစ်အောက်ကလေးများ ဆိုတာ အရေးအကြီးဆုံးဖြစ်တဲ့အတွက် လ အလိုက် ထိုးနှံရမည့် ကာကွယ်ဆေးများကိုလည်း စနစ်တကျထိုးနှံကြရန်နှင့် ကိုယ့်ကလေး၏ ကိုယ်အလေးချိန်ကိုလည်း မှန်မှန်ချိန်ပြီး စနစ်တကျကျွေးမွေးကြရန် တိုက်တွန်းပြောကြားခဲ့ပါသည်။ ယခု ၂၀၂၅ခုနှစ် အာဟာရဖွံ့ဖြိုးရေး လှုပ်ရှားမှုများရက်သတ္တပတ်၏ ဆောင်ပုဒ်မှာ “Invest in Breastfeeding, Invest in the Future” ဖြစ်ပြီး မြန်မာလို ‘ကလေးများအနာဂတ်လှပဖို့ မိခင်နို့ချိုတိုက်ကျွေးလို့၊ ရင်းနှီးမြှပ်နှံကြပါစို့’ ဟူ၍ ဖြစ်ပါကြောင်း” ပြောကြားခဲ့ပါသည်။
ထို့နောက် မြန်မာနိုင်ငံမိခင်နှင့်ကလေးစောင့်ရှောက်ရေး အသင်း ဗဟိုအလုပ်အမှုဆောင်အဖွဲ့ဝင်၊ ဒေါက်တာပပ မှ “ကိုယ်ဝန်ဆောင်နှင့် နို့တိုက်မိခင် အာဟာရ”နှင့် ပတ်သက်၍ လည်းကောင်း၊ မြန်မာနိုင်ငံမိခင်နှင့်ကလေးစောင့်ရှောက်ရေး အသင်း တွဲဘက်အတွင်းရေးမှူး(၂)၊ ဒေါက်တာဒေါက်တာမြင့်မြင့်ခိုင် မှ “ ငါးနှစ်အောက်ကလေးအာဟာရ”နှင့် ပတ်သက်၍လည်းကောင်း အသိပညာပေး ဟောပြောခဲ့ပါသည်။ ထို့နောက် မေတ္တာစမ်းရေ ဆေးခန်းတွင် (၃)ကြိမ်နှင့်အထက် လာရောက်ပြသသော ကိုယ်ဝန်ဆောင်များ(၃၀)ဦးအား အာဟာရပစ္စည်းများ ထောက်ပံ ပေးအပ်ခဲ့ပြီး အခမ်းအနားကို အောင်မြင်စွာရုတ်သိမ်းခဲ့ပါသည်။